Sa kataya so sorat ko manga kandidato a dndodon so manga pakaiza.
April 05, 2010
Assallam Wallaikhom ko manga Guvernatorial ago City Mayoral Candidates.
Aya miyapamikir o manga ndatuaniyo sa gioto a darpa a ArataWata.Com na kagiya di kaparowan so "public debate" sa Ranao, na sii tano badn pakasisinbagaa so manga kandidato sa internet. Mapiya mambo ini ka an mala a oras a kapakapamimikiran o manga kandidato ko smbag iran. Isa pn na mbaloy dn mambo giyaya a internet a sompat o manga taritas iran, mlagilagid siranon sa kapaar.
Sa giyaya a manga smbag iyo na pakalangkap ini sa donya, ko langowan o manga bangsa tano. Na siran mambo a kipakaliliyo (NRP, Non-Resident Pilandok) na maamad iran so manga tindg iyo a manga kandidato na an iran misampay ko manga mbawataan iran sa Ranao i patot a mbotowan. So siranon sa Ranao (RP, Resident Pilandok) na mbgan tano sa print copy a giya manga smbag iyo.
Sa kataya so manga pakaiza, na aya niyo ron dn kasmbaga na sa basa Iranaon an tano makasisinabota piyapiya. Imanto na Isnen, na pakawitn iyo so smbag iyo amay ka Dyamaat, April 9, 2010 sa giya email address: Arata.Wata@ArataWata.Com.
Amay ka Sapto, April 10, 2010 na pakaprngarngann isorat, an da makapangopya, sa ArataWata.Com so manga smbag iyo. Si Arata Wata i somoraton. Sa aya a sasanaan ami na omani isa rkano a kandidato na adn a katooniyo ko pagtao niyo a pakasorat ko manga smbag iyo sa internet. Pakitokawiniyo bo ki Arata Wata o ba ana manga awida akal sa kisoratn ago kipakawitn ko manga smbag iyo.
Sa di saya makasmbag a kandidato na aya maana niyan na daa tindg iyan sa giyaya a manga pakaiza.
Tangkai niyo so manga smbag iyo ko omani pakaiza sa 300 words. Sa sobra on na kapotolon.
Saribanglaon na, aya kon a matitho a ngaran tano na Iranaon, kna oba Mranao, ka so mranao na gioto so kazong (action word) sa ranao ka ppaygo ka odi na antonaa onon i sowaan ka sa roo. Lagid opama o pagampitn ka si garingka ka zong kano sa ranao ka pagodo kano roo. Ptharoon ka na, "mranao ta gari, itaroo..."
Assallam Wallaikhom Wa Rahmatullah.
So Manga Ndatuaniyo sa Ranao
Arata.Wata@ArataWata.Com
>>>
Manga Pakaiza
Ko Kakhaoyagan
- Antonaa i pamikiran ka sa kapakala o kaoyagan ago kapakabangon sa madakl a kaoyagan?
- Antonaa i pamikiranka sa kapakaito o "economic and social reliance" tano sa Cagayan de Oro ago sa Iligan City?
- Pnggalbk ka sa makadakl so ATM machines sa PNB sa Marawi City ka an di pkargni so madakl a tao magwithdraw ko perak iran? 1+ million residents, only 2 ATM machines. Andamanaya i ikidiyangkaon ka antano di pakazong sa Iligan na roo tano di manggasto so perak tano?
Ko Kalilintad
- Antonaa i pamikiran ka sa kada a giyanan a manga dimangarasi (kidnappers, carnappers, di mamotol sa electric posts)?
- Antonaa i pamikiranka sa kapasad o manga rido?
- Andamanaya i kada a giyanan a kandagang ago kaosar sa illegal drugs?
- Antonaai pamikiran ka sa kalikai tano sa kapagabosado a gioto a tunganayngka ago pagtaongka, lagid a gioto a siyowa i Ampatuan sa Magindanao?
Ko Kapagingd
- Antonaa i pamikiranka sa kapakapiya o education? Katawan tano a minibagabagak so manga public schools tano icompare sa manga ingd a saruang a tao. So manga maetro na mababa a tanto so sowa iran.
- Antonaa i pamikiranka sa kapagongowi ko ranao? Lagid o kitargi ko illegal logging ago kalimpiyowi ron.
Ko Kanggoberno
- Pagiog ka a mipublish so monthly odi na quarterly IRA allocations and expenditures ko madakl a
tao?
- Antonaa i pamikiran ka sa kitargn sa giya kapasai sa boto?
Ko Agama
- Ay taman a kakaptingka, kinggogolalannka ago kaplindingangka ko agamangka?
- Antonaa i pamikiran ka sa kapakasowa o manga wata ko agama? So kapakabatiya sa Quran ago kitab.
Para ko Governor bo
- Antonaa i tndg ka ko kapakabaling o manga municipal mayors sii ko manga ingd iran? An iran matatayod so ndatuan iran.
- Antonaa i pamikiran ka sa kitoman ago kapkakompleto o manga government projects?
Para ko City Mayor bo
- Antonaa i pamikiranka ko waste (basura) management ago so kaplimpiyo?
- Antonaa i pamikiranka ko kapakaig (drinking water) o madakl a tao?
Para ko pithangizaan a kandidato
Aleem Abu Hanad Dimakuta
Kagarantor ka a omaka taban ka sa bebernador na dingka sayanan so mianga oonaan ka a ulama a mia thotola sa kurang? Ago kano di sosopaka a manga ulama ba daa sarig iyo ko omani isa?
City Mayor Pre Salic
So kinitarosen ka ko kiabaloy a mayor o pagaringka a si "Solitario" ba aden mambo a mini panompat ka ko mga ompiya a mianga papasad i pagaringka? Ago opama a makataban ka saroman na ba ana mala gibgay ingka a ompiya a kabaloy a dika kalipatan o madakl a tao?
Governor Bombit Adiong
Sekami a a maka lilio sa Pilimpinas na kabaya ami a sii amireka katokawi o antonaa i mga mia ngapapasad ka ko kiabaloy ingka a bebernor. Ago opama a makataban ka saroman ana mala gibgay ingka a ompiya a kabaloy a dika kalipatan o madakl a tao?
Kapakay a di smbagn ini
Pagiog ka a mitapi a Lanao del Sur sa Misamis Oriental, mawa tano sa ARMM, ka antano kaosbai gioto a di tano roo di ngastoon a perak tano, makakasoy rktano so ompiya makaokit sa tax o ditano roo dinggastoon? Lagid bo ka langon dn a pamamasaan tano na roo, taman ko kangitagita tano na roo songowi. Giyadn a pangampong a Ranao.